گھر پہنچ کر میڈیا سے گفتگو کرتے ہوئے ارشد ندیم نے کہا کہ خوشی بھی تھی کہ آگے 14 اگست آرہی ہے، یہی کوشش تھی کہ میڈل لے کر جاؤں، نیرج کی والدہ بھی میری والدہ ہیں، ہم ایشیا کے دو ہی کھلاڑی ہیں جو ساری دنیا میں کھیل رہے ہیں۔
ارشد ندیم نے مزید کہا کہ میں نے جو محنت کی اللّٰہ نے اس کا پھل دیا، اللّٰہ کا بہت کرم ہے میں نے تاریخ رقم کی، اپنے والدین کی دعاؤں سے گولڈ میڈل جیتا۔
انہوں نے کہا کہ یہ ملک بہت پیارا اور خوبصورت ہے، لوگوں کا پیار دیکھ کر بہت خوشی ہوئی،میری خواہش ہے مستقبل میں نوجوانوں کو اس طرح کی مشکلات پیش نہ آئیں جو میں نے دیکھیں۔
ارشد ندیم نے کہا سب کا شکریہ ادا کرتا ہوں جنہوں نے میرا والہانہ استقبال کیا، میاں چنوں اور پورے ملک کے لوگوں کا شکریہ ادا کرنا چاہتا ہوں جنہوں نے مجھے اتنا پیار اور عزت دی۔
ارشد ندیم کا قافلہ ساہیوال بھی پہنچا تھا، جہاں ساہیوال بائی پاس پہنچنے پر شہریوں نے ان پر پھول نچھاور کیے تھے۔
آج صبح ارشد ندیم لاہور ایئر پورٹ سے تبلیغی مرکز رائیونڈ آئے تھے جہاں ان کے قافلے نے ایک گھنٹہ قیام کیا تھا۔
وہ تبلیغی مرکز رائیونڈ میں نمازِ فجر ادا کرنے کے بعد میاں چنوں روانہ ہوئے تھے گزشتہ رات ارشد ندیم ایئر پورٹ پہنچے جس پر عوام نے ان کا والہانہ استقبال کیا گیا تھا۔
ایئر پورٹ پر ارشد ندیم اور پاکستان زندہ باد کے نعرے لگائے گئے اور شہریوں نے اپنے ہیرو کو کندھوں پر اٹھایا۔
واضح رہے کہ جیولین تھرو ایونٹ کے فائنل میں ارشد ندیم نے پاکستان کو 40 سال بعد گولڈ میڈل جتوایا ہے۔
