حسیب اللّٰہ نے مداحوں اور میڈیا سے جھوٹی خبریں پھیلانے سے گریز کرنے کی اپیل کر دی،

قومی کرکٹ ٹیم کے نوجوان وکٹ کیپر اور بلے باز حسیب اللّٰہ خان نے پاکستان چھوڑ کر انگلینڈ منتقل ہونے کی زیر گردش خبروں پر خاموشی توڑ دی ۔حسیب اللّٰہ خان نے ملک چھوڑ کر انگلینڈ منتقل ہونے سے متعلق خبروں کو بے بنیاد اور جھوٹی قرار دیتے ہوئے کہا کہ وہ ہمیشہ پاکستان کی نمائندگی کرتے رہے گے۔
22 سالہ کھلاڑی کا کہنا ہے کہ مستقبل قریب میں بین الاقوامی سطح پر قومی ٹیم کی نمائندگی کرنے کا ارادہ بھی رکھتا ہوں۔
انہوں نے انسٹااسٹوری میں لکھا کہ میں آپ سب کو مزید بتانا چاہتا ہوں کہ میں اپنے ڈومیسٹک کاؤنٹی کنٹریکٹ اور اسپانسرشپ کی ذمہ داریوں کے سلسلے میں انگلینڈ آیا ہوں۔
انہوں نے واضح کرتے ہوئے لکھا کہ میں صرف کاؤنٹی کرکٹ کھیلنے کے لیے انگلینڈ میں موجود ہوں اور میرا قومی ٹیم تبدیل کرنے کا کوئی ارادہ نہیں ہے۔
حسیب اللّٰہ خان نے مزید لکھا کہ میں پوری لگن اور جذبے کے ساتھ اپنے ملک پاکستان کی نمائندگی کرنے کے لیے پُرعزم ہوں اور اپنی تمام تر توانائیاں اس مقصد کے لیے وقف رکھوں گا۔ حسیب اللّٰہ نے مداحوں اور میڈیا سے جھوٹی خبریں پھیلانے سے گریز کرنے کی اپیل بھی کی۔
واضح رہے کہ گزشتہ کئی دنوں سے سوشل میڈیا پر پاکستان سپر لیگ (پی ایس ایل) کے 10ویں ایڈیشن میں کوئٹہ گلیڈی ایٹرز کی نمائندگی کرنے والے نوجوان وکٹ کیپر بلے باز حسیب اللّٰہ سے متعلق افواہیں گردش کر رہی تھیں کہ وہ انگلینڈ منتقل ہوگئے ہیں