چیمپئنز ٹرافی 9 سے 19 فروری تک ، پی سی بی نے شیڈیول بنا دیا

آئی سی سی چیمئنز ٹرافی اگلے سال پاکستان میں ہونے جا رہی ہے جس کیلئے پاکستان کرکٹ بورڈ نے حتمی شیڈیول منظوری کیلئے آئی سی سی کو بھیج دیا ہے ۔ پاکستان کرکٹ بورڈ کی طرف سے آئی سی سی کو بھیجے گئے شیڈول کے مطابق چیمپئنز ٹرافی 19 فروری سے 9 مارچ تک ہوگی ۔ مجموعی طور پر 15 میچز ہوں گے۔ یہ میچز نیشنل سٹیڈیم کراچی ، قذافی سٹیڈیم لاہور اور راولپنڈی اسٹیڈیمز میں کھیلے جائیں گے ۔ شیڈیول میں بھارتی ٹیم کے متعلق تجویز کیا گیا ہے کہ بھارتی ٹیم اپنے تمام میچ قذافی اسٹیڈیم لاہور میں کھیلے گی۔ ٹورنامنٹ کا افتتاحی میچ نیشنل سٹیڈیم کراچی میں ہوگا ، اسی طرح کراچی ایک سیمی فائنل میچ کی میزبانی بھی کرے گا ۔ مجموعی طور پر تین میچز کراچی میں کھیلے جائیں گے۔ اسی طرح ٹورنامنٹ میں فائنل سمیت 7 میچ لاہور میں ہوں گے ۔ راولپنڈی ایک سیمی فائنل سمیت 5 میچوں کی میزبانی کرے گا ۔ چیمپئنز ٹرافی سے قبل قذافی اسٹیڈیم میں پی سی بی ہیڈ کوارٹر کی جگہ جدید کارپوریٹ باکسسز بنائے جائیں گے، پوری بلڈنگ کو نہیں گرایا جائے گا کیونکہ ڈریسنگ روم حال ہی میں بنے ہیں اس لیے وہ اپنی جگہ موجود ہوں گے، فضل محمود اور عمران خان انکلوژر میں تماشائیوں کی گنجائش بڑھائی جائے گی اور موجودہ انکلوژر کے پیچھے سے انکلوژر کو مزید اونچا کیا جائے گا۔ ذرائع پی سی بی کے مطابق لاہور، کراچی اور پنڈی اسٹیڈیم میں نئی ڈیجیٹل اسکرینز نصب کی جائیں گی، کراچی کے نیشنل اسٹیڈیم کی بلڈنگ کی حالت کو بہتر بنایا جائے گا اور اسکور بورڈ کے ساتھ یونیورسٹی اینڈ پر نیا میڈیا سینٹر تعمیر کیا جائے گا۔ جہاں چیمپئنز ٹرافی کیلئے تمام سٹیڈیمز میں جدت لائی جا رہی ہے وہاں ٹیم میں بھی بڑی تبدیلیاں لانے کا اعلان کیا گیا ہے اور یہ اعلان آئی سی سی مینز ٹی ٹوئنٹی ورلڈ کپ میں امریکا کے بعد انڈیا کے ہاتھوں لگاتار دو میچ ہارنے کے بعد چیئرمن پی سی بی محسن نقوی نے کیا ۔ انہوں نے واضح اعلان کیا تھا کہ چیمپئنز ٹرافی کیلئے ٹیم میں بڑی تبدیلیاں لائی جائیں گی اور باہر بیٹھے ہوئے ٹیلینٹ کو موقعہ دیا جائے گا